Watapi uk kutita Ch’uta Raymi ruwarikun Vacas llaqtapi, provincia Arani, departamento Cochabamba, imapaq? Kawsayninchista kallpachanapaq, culturanchikta uqharikapunapaq, culturanchisqa: p’acha, takiykuna, tocaykuna, yachayninchis, awaykuna, qhichwa ruwayninchis, chaqra patapi uk pueblo indígena originario campesino kawsakusqanchis. Ch’uta Raymitaqa wakichinku Radio Chiwalaki, Central Regional Chiwalaki, Central de Mujeres Vacas, Central Regional 1º de Marzo Rodeo, Gobierno Autónomo Municipal de Vacas, subcentrales Misuk’ani, Paredones, Yanatama, Cañadas, Santa Bárbara, Sindicato Misuk’ani.

"Ch'uta Raymiwanqa maychaytapuni kusirikunchis" 

Runawan parlarisqapiqa paykunaqa anchatataq suyanku Ch’uta Raymi ruwakunanta: Eustaquia Gonzales, qanchis chunka pusaqniyuq watayuq karichkan nin: “Ch’uta raymiqa may unaymanta, sipaku kachkaspa tususpa, tarikispa comparsapi, ñawpa p’achasniykuwan tropeariq kayku. Ummm manchaytapuni Ch’uta Raymipiqa kusirikunchis, orgullo jallch’asqamanta p’achata urqhurimuspa wawasman rikurichiy, kunanqa mañana nipi chay ñawpa p’achaykutaqa churakunchu, ni nuqapis, valluna p’achayuq karichkani”

"Radio Chiwalaki culturata pataman uqharin"

Convocatoriata Radio Chiwalaki urqhun, t’inkastari tukuynin instituciones, municipio ima churanakunku; convocatoriaman jinaqa atinku comparsas chinpaykamuyta, kanan tiyan ñawpa p’achasninkuwan, acorlolasta aysarispa, charangosta raqharispa, warmikuna, qharikuna ima. Ch’uta Raymi p’unchayqa tropasqa phachkarikamunku, mana Municipio Vacasllachu, jamurillankutaq provincia Tiraquemanta, provincia Carrascomanta, culturankuqa mana t’aqasqachu ñawpata karqa, jatun territoriopi kawsakuq kanku, qhipallamanña Bolivia suyunchispi t’aqarawanchis departamentospi, provinciaspi.

"Juk'utapis tablasmanta, watus waka qaramanta kaq"

Sumaqta takirispa, tusurispa atipanakuman qillqirichikunku, 2013 watapi chunka suqtayuq tropas karqanku, p’achanku may ñawpamanta ruwasqa, chirita muchunapaq jina, juk’utastapis paykuna kikin waka qarawan, maderasmanta ruwakuspa apamurqanku. Mama Eustaquia nillanpuni: “Ñawpataqa zapatosqa mana karqachu, tatasniyku sach’amanta maderata urqhuytawan juk’itastaqa ruwaq kanku, watusnintapis waka qaramanta churaq kanku, nuqaykuqa atin mana atin chaywan purikuq kayku, kunallanma tukuy ima rantinapaq kan”.

Nelly Gonzlaes radio chiwalkimanta nillantaq: “Kay ch’uta raymiqa ñawpa p’achanchista uqharikapunapaq, mana chinkananpaq. Unayqa kuraq tatasninchis waq jinatataq p’achallikuq kasqanku, paykuna kikin phuchkaspa, k’antispa, awaspa pantalonta, pollerata ruwakuq kanku”.

"Wawasman ñawpa p'achasta rikuchina"

Santusa Rodríguez nillawarqaykutaq: “Imaynatataq ñawpata takiriq, tusuriq kanku tatas, mamas chayta ñawpaqman apananku tiyan, imaynataq p’achas karqa ñawpa tiempos chayta uqharikapuspa kallpachana tiyan, wawasman rikuchina tiyan, culturata kawsayninkuta mana qunqanankupaq”.

Tata Juvenal nillantaq: "Kay ch’uta raymiqa, may unaymanta, kay Vacas chiqapiqa sapa wata Radio Chiwalaki waqyarichiwayku, jamuytawan ñawpaq culturaykuta, takiyniykuta, pach’alliyniykuta riqsirichinaykupaq. Kaypaqqa sumaq jallch’asqamanta p’achasniykuta urqhurimuyku, takirikuyku. Ñawpataqa ajinapuni kay Vacas regionpiqa karqa. Ñawpa kawsayta mana qunqayta atiykuchu, chayrayku kusirikuq, takiriq, acordolata waqarichik jamuyku”.

 TAKIRIKUNA

Mama Eustaquia Gonzales kay jinata takiripuwarqayku payqa comunidad Chawllamayumanta:

Takiriy niwanki

takirisaqchari (Bis)

           #     #

China jukumari, urqu jukumari,

watukuq jamuyki, qhalincha comadre.

           #     #

Tocay charangota, aysay chay machuta,

qaqaman tanqaykuy chay khuchi machuta.

 2013 watapi kay tropas karqanku:

Ch’uta fandango, comunidad Misuk’ani, Subcentral Misuk’ani.

Ch’uta seguida, comunidad Qullpa Qucha, Subcentral Santa Bárbara.

Ch’uta seguida, comunidad Cañada Núcleo, Subcentral Cañadas.

Ch’uta seguida, comunidad Paqchapata, Subcentral Paredones.

Ch’uta fandango, comunidad Jatun Pampa, Subcentral Paredones.

Ch’uta fandango “Tarwi Tarpudores” Villa Barrientos, Subcentral Rodeo.

Ch’uta seguida, comunidad Parqu Qucha, Subcentral Misuk’ani.

Ch’uta seguida, comunidad Leon Rancho, Subcentral Muyuq Ch’ipa.

Ñawpa Ch’utas Arcosaya comunidad Musuq Rancho, Subcentral Junt’utuyu.

Ch’uta wayñu, comunidad Wayra Pata, Subcentral Yanatama.

Ch’uta seguida, Regional Abaroa, Provincia Tiraque.

Ch’uta Seguida, comunidad Kawka, Subcentral Rodeo.

Ch’uta seguida Rosas T’ika, comunidad Paredones, Subcentral Paredones.

Ch’uta seguida, comunidad Siqi Ranchu, Subcentral Cañadas.

Ch’uta seguida, Provincia Carrasco.

Ch’uta seguida, comunidad Pila Pata, Subcentral Cruce.