Tata Isiku chúkaro yuntasta amansan
Chay raymiman chinpaykurqayku, runa masiwan parlarirqayku:
“Tata Isikuq sutinpi uywasta uywakuyku”
Don Cornelio nin: “Kay yuntas llank’achkanku chayqa culturanchiqta significan, imaynatachus unay tatasninchiq llank’arqanku, chayta representachkanchiq. Yuntasqa tukuy clase jatuchiqmanta juch’uychiqmanta kachkanku, Isikuqa poderniyuq, yuntankuta amansachkanku, tata San Isidro bendicionta qunqa. Paypaq sutinpi nuqaykuqa animalesta uywakuyku”.
“Pachamamaqa montepi animalesta uywan”
“Nuqaykuqa uqharikuyku Pachamamasmantapacha, paypis yanapawayku, pachamamaqa montepi animalesta uywan, animalesqa montepipuni kawsanku, mana facilchu animales uywaypis, chinkarpaptinkupis llakiyta mask’aspa puriyku. Chaypitaq Tata Isikumanta mañarikuyku, tatanchikmanta jina paytaqa jatunyachiykutaq, juch’iyachiykutaq”.
Ajnata nuqataqa Tata Isiku musquchawan:
− Chakiy t’ukpiriwanki i? Kunan nuqapis qanpaq votarisaq nispa niwan.
− Imapaq ajinata musqukuniri? Nirqani, chaymanta wakitay montepi karqa, jinallapi uñitayuq tarikapurqani, Tata Isiku nuqapaqqa milagroso.
Tata Isiku montepi uywata qhawananpaq, lawrachichkayku
Tata Isikuqa mana uywasllapichu yanapaq kasqa, kikillanmantataq chaqras sumaq puqunanpaq yanapallantaq nin. Tata Isikupis mana chay sutiwanchu karqa, sutin kasqa “Tata San José” aswan ñawpaqtaqa.
“Novillosta amansanku mana chúkaros kananpaq”
Don Milton Jiménez ninllantaq: “Kay llank’asanku calvariopi chaytaqa, iskay chunka phichqayuq watas jinallaraq rikhurichinku Tata Isidro llank’aq runa karqa nin, chantachá rikhurichinku, novillitusta amansanku, mana chukarus kananpaq, kay Tata Isiku agriculturesman yanapawayku, chaqra puquypi allin rinawaykupaq”.
“Paypi creespa llank’aytaqa qallariyku”
"Jallp’a llank’aq yaykuyku, paypi creespa, chayman jinataq chaqrasniyku puqun, ni ima pasanchu chaqrasniykutaqa. Kunitan llank’achkayku chunka phichqayuq, chunka kimsayuq yuntas, kunan tumpa pisi kachkan, tractorespis kay jina llank’arichkanku".
Tata Isikuq jallp'anpi tarpurichkayku
Tata Isikuman apaq kasqanku yuntasta amansanankupaq chaywantaq sumaqta chaqrasta puquchinankupaq, chaymantapis tumpatawanpuni parlarin kay uq comunario.
“Manchachista amansaq apamuyku”
Evaristo Sejas Ricaldes willariwanchis: “Ichhuma comunidadmanta yuntata aparimuyku, Tata Isidro milagroso kaptin, kay manchachista amansaq apamuyku, tata Isidroqa milagroso. Tata Isikumanta mañakuptin sumaq puqun chaqras, chantapis mansuyan bueyespis”.
Nuqapis yuntero kanaypaq amañachkani
“Sumaq yuntero kanaypaq mañakuchkani”
Waynuchitu Richard Almendras, chunka iskayniyuq watayuq niwanchis: “Tata Isidroq jallp’anpi llank’arichkani, kay novillosta amansachkani. Nuqapis sumaq yuntero kanaypaq Tata Isikumanta mañakuchkani. Mana machu runasllachu llank’anku, waynuchukunapis yuntawan llank’allaykutaq, paykunaqa sumaq yunteros kanankupaq amañachkanku”.
Tata San Isidro, comunidad Taboada, provincia Mizque
Qillqan: Julia Román M. - CENDA
