Acompañando las estrategias propias de manejo, control del territorio y los recursos naturales

RAQAYPAMPA, EDUCACIÓN: Wata 1992pi jatarichirqanku Consejo Comunal Educación nisqata. Imapaq?. Comunidadpi escuelitas educación apayqachasanku chaykunata qayllamanta watunankupaq, comunidad jina. Chaypaq uk sinchi kamachiyta churarqanku, Calendario educativo kawsayninkuman, yachayninkuman jina kananta, chaytaq karqa Calendario Educativo Regionalizado, chantá educación iskay qallupi kananta qhichwa-castellano, jinallataq comunidadpaq yachaynin escuelas ukhupi yachachikunanpaq, manataq jawa yachayllata qhawasanapaq.

 3 Bases en evento Raqay

 

Pasaq julio killapi (2017) Tata Santiago ñawpaqsituta tantarikurqanku runa masi kaqkuna Central Regional Sindical Única de Campesinos Indígenas Raqaypampa (CRSUCIR) chantá Consejo Educativo Regional Alturas (CREA) ima waqyachiptin. Chaypitaq waturirqanku imakunatataq ña parlarisqankuña comunidadpi educación apayqachakunanta. Karqanku suqtantin subcentrales: Salvia, Santiago, Molinero, Laguna, Raqaypampa, jinalltaq warmi organizacionmanta kallarqankuta iskay subcentrales: Raqaypampa, Santiago ima, kallarqankutaq CEFOA, Consejos Comunales Educacionmanta, Juntas Escolares, pachaq kuraq runakuna karqanku. 1992 wata educacionpi sumaq thaskiyta puririrqanchis.

 

Ima laya educación kunitan kachkan?

“T’ukurina: ima laya educaciónpi kunitan kachkanchis? Ima laya educacióntataq munasunchis?, manachayri kusallachu kachkan”. Nirqa Gualberto Albarracín, ejecutivo Central Regionalmanta.

 

“Watiqmanta uqharina tiyan comunidad jina educacionmanta parlasqasninchikta”

“Educacionta mask’arqanchik wawasninchikpaq, chaypaq jatarichirqanchik Consejos Comunales Educacionta (CCE), Consejo Regional Educación Alturas (CREA). Yuyani chayta mana apayqachasqanchikta, parlalla mana ni ima kanchu. Ari congresospi manachay ima tallerpi tunpata parlarpanchik, manataq practikaman churanchikchu. Nillataq yachahiqkunawan allin coordinación kanchu. Qhawani llawchiyapusqanchikta”. Nispa evaluarirqanku.

 

3 Tata Gualberto Ejecutivo CSRUCIR

Gualberto Albarracín, Ejecutivo CSRUCIR

 

Educación regularqa mana kawsayninchikman jinachu

“Yachachiqkuna, distritales imaqa educaciónta mat’írikapunku leyes nacionales jamusqanman jina. Niwanchiktaq, -qankuna nisankichik chayqa mana leypi nisanchu-, nispa”. Ajinapiqa planificación, evaluaciones ruwasqanchikqa qhasipaq qhipakapun. CCEwan wakichisqanchik, yuyaykunata churasqanchik qhasi pampaman qhallikapun. Watiqmanta uqharina tiyan comunidad jina educacionmanta parlasqasninchikta.

 

“Ari, icha waynuchus, sipakus kaqkunaqa mana anchata umachakunkuchu Consejos Comunales Educacion (CEE) imakunatachus kamachisqantaqa. Chaywanpis kay jina tantakuykunawanqa watiqmanta uqharikapuna tiyan chay imatachus nisqanchikta, Educacionta Comunidad jina, kawsayninchikman jina apayqachanata”.

 

Autonomiamantapis sutillata yachanku

“Qhawaychik, kunanpi parlasanchik Autonomía Indigenamanta, jinapis educación regularpiqa sutillata yachanku. Manachay niwanchik, -CEFOApi autonomiamantaqa parlanku-”.

 

“Colegiotapis sayachinchiqña, jinapis mana kawsayninchikman jinachu educacionta apaykachasanchik, mana qhawachkanchikchichu kaymanta qhipaman kawsanapaq”. Nirqanku runa masi kaqkunaqa. Ajinata tallerpi t’ukurinku educacionmanta.

 

CÑ Nº 164, Septiembre 2018 (Año 34)

Jr.

Visto 187 veces Modificado por última vez en Miércoles, 18 Julio 2018 17:22
Compartir esa articulo

Sobre el Autor

CENDA

CENDA es una institución sin fines de lucro que acompaña las estrategias propias de manejo y control del territorio y recursos naturales. Comparte nuestros contenidos y síguenos en nuestras redes sociales para estar al tanto de nuestras actividades.

Sitio Web: cenda.org
Inicia sesión para enviar comentarios
Top